Category Archives: Uncategorized

Ras y Gwyll yr Wyddfa Inov8 2019 – adroddiad

by Stephen Edwards

 

Ras y Gwyll yr Wyddfa Inov8 2019 – adroddiad cyn y ras

Y dydd Gwener yma (Mehefin 28) fydd ras gwyll Inov8 fwyaf erioed er cychwyn nol yn 2015.

Wrth i boblogrwydd Ras Ryngwladol yr Wyddfa gynyddu flwyddyn ar ôl blwyddyn, mae Ras y Gwyll yn ymarfer perffaith i redwyr sydd am gloriannu eu cyflwr cyn y ras fawr ei hun.

Mae hon hefyd yn ras i’r rhai sydd yn gweld mwy mewn rhedeg i fyny nac i lawr. Mae’r ras yn cychwyn yn Llanberis ac yn gorffen ar ben yr Wyddfa 1085m uwchlaw’r môr. Gyda lwc gall y rhedwyr syllu ar fachlud godidog wrth ymlwybro’n ôl tua’r gwaelod..

Eleni bydd rhai rhedwyr rhyngwladol Prydain ac athletwyr talentog o Gymru, Lloegr, Yr Alban ac Iwerddon. Mae tua 200 am redeg. Bydd y ras yn cychwyn am 7pm.

Yn ras y dynion mae enillydd y ras yn  2016 Dave Archer Matlock AC a chyd aelod  Alex Pilcher, sydd  wedi bod yn y 10 cyntaf yn ddiweddar yn Nhreialon Rhedeg i fyny Ewrop gynhaliwyd yn Ardal y Llynnoedd.

Bydd Russell Bentley, sy’n byw yn lleol, yno i weld sut siâp fydd arno cyn y ras fawr. Bydd unwaith eto’n cynrychioli Cymru. Mae wedi bod yn mynd yn dda yn ddiweddar.

Hefyd ar ei orau mae enillydd hanner Marathon – Marathon Trywydd  Cymru Salomon Dan Connolly. Yn dychwelyd i ardal y bu’n byw ynddi o Salford fydd Callum Rawlinson – mae o’n nabod y cwrs yn dda.

Yno hefyd fydd Stephen Pyke, Michael Cayton a llu o redwyr lleol. Bydd ras y dynion yn sicr yn un gystadleuol iawn.

Os yw ras y dynion yn un gystadleuol – yn ddiamau mae’r un peth yn wir am ras y merched – a all fod yn uchafbwynt y noson.

Y ffefrynnau i ennill ydyw un o redwyr rhyngwladol Prydain, Hatti Archer, Emma Clayton trydydd ym Mhencampwriaeth Rhedeg Mynydd 2015 ynghyd ag enillydd blaenorol Ras yr Wyddfa Sarah McCormack.

Cafodd Hatti Archer ei dewis i Bencampwriaethau Ewrop sydd ar ddigwydd ar ôl bod yn ail mewn ras dreialu ddiweddar ar fynydd Skiddaw yn Ardal y Llynnoedd. Mae  Sarah McCormack hefyd ar ei gorau gan fethu â churo Hatti Archer yn y ras o ddim ond hanner munud

Yma hefyd bydd dwy o enillwyr y ras wyll o’r blaen: Beth Hanson a Sarah Willholt. Yn ogystal yn rhedeg bydd Annabelle McQueen, rhedwyr Eryri a rhedwraig ryngwladol Yr Alban  Miranda Grant. Bydd ras y merched yn dipyn o frwydr.

Manylion llawn i’w cael ar Wyll yr Wyddfa Inov8  tudalen y ras <https://www.snowdonrace.co.uk/twilight-race/>

Diwedd

2019 – Noddwyr newydd a rasio Cwpan y Byd

by Stephen Edwards

Noddwr newydd a rasio Cwpan y Byd – Ras yr Wyddfa orau erioed ?

Llanberis – Gyda phrif noddwr newydd, Castell Howell, a 650 o redwyr mae ras 2019  mae  44ain Ras Ryngwladol yr Wyddfa Castell Howell yn argoeli’n un o uchafbwyntiau chwaraeon Cymru eleni.

Mae yna gryn edrych ymlaen eleni eto, gyda rhai o redwyr gorau Prydain yn cymryd rhan. A rhedwyr o safon fyd-eang o Gymru, Yr Unol Daleithiau, Cenia, Japan, Ffrainc, Lloegr, Yr Alban,  Yr Eidal Iwerddon a Gogledd Iwerddon. Bydd y rhain yn cystadlu a rhedwyr cyffredin hen ac ifanc ar y 10 milltir i fyny ac i lawr yng nghalon Eryri.

Yn 2019 mae’r ras yn rhan o gyfres Cwpan y Byd y Gymdeithas Redeg Mynydd. Mae’r gyfres yn 7 ras gyffrous mewn 7 gwlad wahanol gyda 140km o lwybrau i’w rhedeg 9300m o redeg i fyny a’r gwobrau i gyd yn werth 56 000 ewro, bydd y rasys hyn yn graddio rhedwyr mynydd ar safon fyd-eang. Ras rownd 4 yn y gyfres fydd Ras yr Wyddfa eleni.

Mae ras yr Wyddfa’n cael ei chyfrif un un o’r rasys mynydd mawr ac yn denu’r goreuon i gystadlu. A thros y deugain mlynedd a mwy y bu’n cael ei chynnal mae miloedd o redwyr mwy cyffredin wedi bod a’i fryd ar gystadlu dim ond ychydig gannoedd sydd wedi ei rhedeg.

Yn dangos pa mor boblogaidd yw’r ras gwerthwyd y 650 lle i gystadlu o fewn diwrnod ar Fawrth y cyntaf. Wedyn heb oedi roedd Stephen Edwards y trefnydd yn medru cau pen y mwdwl o ran cystadleuwyr a mynd ati i baratoi ar gyfer ras 2019.

Mae Stephen yn awyddus iawn i bwysleisio mai dim jest ras sydd yma. Mae yna noddwyr yn cefnogi, atyniadau yn y cae lle mae’r ras yn cychwyn – yn wir mae bywyd Llanberis ar  y trydydd penwythnos yng Ngorffennaf yn troi rownd y ras:

“Mae’n argoeli y bydd ras 2019 yr orau erioed! Ein prif noddwyr newydd eleni yw Castell Howell ac y mae’n gyffrous iawn bod rownd 4 Cwpan y Byd yn Llanberis!

“Gwelodd Castell Howell y cyfle i noddi’r ras hynod hon fel modd cadarnhaol o ddod i gyswllt â’r gymuned leol.

Meddai Kathryn Jones Cyfarwyddwr Gwerthiant Castell Howell:

“Mi ydym yn falch iawn o’n gwreiddiau gwledig a chefnogi’r cymunedau yr ydym yn gweithio yn eu plith ydyw un o’n gwerthoedd canolog. Yma yn y Gogledd mi ydym yn lwcus o gael yr Wyddfa – mynydd sydd a’i enwogrwydd ymhell tu hwnt i Gymru. Mae’r mynydd yma fel cefndir o fewn dim i ardal lle byddwn wrthi’n ddyddiol yn danfon nwyddau i’n cwsmeriaid. Mi ydym wrth ein boddau’n cael y cyfle i gefnogi’r 44ain ras: Ras Ryngwladol yr Wyddfa Castell Howell, ras sy’n croesawu rhedwyr o Gymru a phedwar ban y byd..”

Ac meddai Stephen Edwards:

“Cawsom y cynnig eleni i fod yn rhan o Gwpan y Byd. Ac wrth gwrs yr oeddem wrth ein boddau. Dylai hyn godi proffil y ras ymhellach eto ar lwyfan byd. Bydd hyn yn siŵr o sicrhau y bydd athletwyr o safon byd yn cystadlu..

“O ran y cyfryngau bydd rhaglen deledu ar y ras ar y Sul canlynol ar S4C a byddwn yn defnyddio Facebook Live i ddangos diwedd y ras. Fel mudiad gwirfoddol yr ydym ninnau yn rhoi oriau lawer o waith i drefnu ochr gymunedol y digwyddiad. Bob blwyddyn bydd busnesau lleol yn rhan o’r ddarpariaeth a bydd miloedd o bobl yn ymddangos i wylio’r rhedwyr o’r dechrau i’r diwedd. Mae pawb ar ei ennill.

“Mae’r bwrlwm yn Llanbêr  cyn y ras yn anhygoel. Rhaid i rywun fod yno i ddeall hynny. Mae’r ras yn golygu cymaint i’r pentref. Maent yn falch o’r ras a’r hyn mae’n ei ddangos i’r miloedd o ymwelwyr. O feddwl cymaint y mae wedi tyfu ers ei chychwyn digon disylw ymhell yn ôl yn 1976.”

“Ond mae’n bwysig nodi na ellid cynnal yr achlysur heb gefnogaeth Inov8, Clif Bar, Cwmni Trên Bach yr Wyddfa, Gwesty’r Victoria, S4C (teledu eto), Athletau Cymru, Ffrwythau DJ,  Scaffaldiau Steel , Sports Pictures Cymru, y pwyllgor a phobl Llanberis. Dyma sy’n dod a’r hwyl a’r hud i’r digwyddiad – mae’n ddigwyddiad rhyngwladol gyda naws lleol – hir y parhao felly. Byddwn hefyd yn lecio diolch i Adran Weithgareddau Cyngor Gwynedd am gefnogi’r ras unwaith eto eleni yn enwedig o gofio ei bod yn ras sy’n rhan o bencampwriaeth y byd.”

Hefyd yn digwydd yr haf hwn mae ras inov-8 Gwyll yr Wyddfa, sy’n cael ei threfnu gan bwyllgor Ras yr Wyddfa. Ras i fyny’n unig yw hon ar ddydd Gwener Mehefin 28. Disgwylir i dros 150 o redwyr gymryd rhan, gan gychwyn am 7 o’r gloch y nos. I redeg y ras hon ewch i wefan Ras yr Wyddfa.

DIWEDD

Adroddiad Ras – 43ain Ras yr Wyddfa JEWSON

by Stephen Edwards

Alberto Vender yn cadw bri’r Eidal a Bronwen Jenkinson yn llwyddo dros Gymru

Dyma’r ddau a wnaeth eu marc ar Ras yr Wyddfa 2018

Bu’n gyffro unwaith eto ar fynydd uchaf Cymru gyda bron i 600 o redwyr yn mynd ati i wneud eu gorau i fyny llwybrau caregog yr hen fynydd. Ar y brig wedi ymdrech fawr daeth Alberto Vender o’r Eidal. Dilynnodd ôl traed ei gydwladwr Davide Magnini a oedd yn fuddugol y llynedd. Eidalwr arall at y casgliad a adawodd eu hôl yn gorffennol: Martin May, Fausto Bonzi a Marco DeGasperi.

I Bronwen Jenkinson o’r Waunfawr, mi oedd hwn yn siŵr yn ddiwrnod mawr iawn iawn.  Bu ras 2016 yn un siomedig iddi, yn 2017 yr oedd yn bedwaredd, ond eleni yn ei thrydydd ymgais dyma gipio’r wobr. Dyma’r Gymraes gyntaf i ennill ers Angela Carson yn 1989.

Roedd hi’n gymylau isel ac yn boeth a chlos wrth i’r rhedwyr fynd ar i fyny am y pum milltir, er ei bod ychydig yn oerach o dop Allt Moses i fyny. Roedd y golygfeydd i gyd yn cuddio, a’r rhedwyr a’u trwynau ar y llwybr. Dyma ras bellach wedi prifio dipyn o’i chychwyn cyntaf yn 1976 i fod yn ddigwyddiad o bwys rhyngwladol.

Mae hefyd yn ras gyda chefnogaeth leo,l a gwelwyd cannoedd o ardalwyr ac ymwelwyr ar y lôn ac ar y mynydd yn cefnogi’r  achlysur. Cychwynwyd y ras am hanner dydd gan y Cynghorydd Ioan Thomas (Deilydd y portffolio datblygu Economaidd Cyngor Gwynedd).

Ar y cychwyn roedd dau o redwyr Lloegr yn arwain: enillydd 2016 Chris Smith a Chris Holdsworth gyda Rob Samuel tîm Cymru yn eu cwmni. Hanner ffordd i fyny Chris Smith oedd yn gyntaf ac yn bedwerydd cryf Zak Hanna o Ogledd Iwerddon. Tua munud yn arafach roedd Alberto Vender, Guilio Simonetti ac enillydd 2012  Murray Strain.

Wrth i’r ras fynd rhagddi drwy Allt Moses, Clogwyn a Bwlch Glas ennill tir o hyd wnai Alberto Vender gan ddal Rob Samuel a oedd ychydig y tu ôl i’r arweinydd Chris Smith, wrth agosau at y copa.

Yn y cyfamser yn Ras y Merched roedd  Bronwen Jenkinson wedi gafael ynddi o’r cychwyn i fyny Allt yr Parc am Benceunant. Erbyn hanner ffordd yr oedd ganddi gryn flaen dros y tair Saesnes Sophie Noon, Scot Miranda Grant a Caitlin Rice.

Ni fu dim newid ac erbyn y copa ac yr oedd Bronwen Jenkinson wedi ennill mwy fyth o dir – bellach ddau funud llawn ar y blaen.

yn ôl i ras y dynion: wrth fynd am i lawr o’r copa  yr oedd gan Chris Smith o hyd flaen sylweddol ar Alberto Vender a Rob Samuel.

O hynny ymlaen gwibiai Chris Smith ar i waered yn nadreddu rhwng rhedwyr eraill a cherddwyr gydag Alberto Vender yn nesau a nesau ato wrth i’r ddau agosau at bont Clogwyn gyda cherrig mân yr Allt Goch yn crensian dan eu gwadnau.

O’r diwedd aeth Alberto Vender amdani gan wibio heibio Chris Smith yn dangos ei allu arbennig o redeg i lawr. Erbyn Hanner Ffordd i lawr yr oedd wedi ennill blaen o 10 eiliad.

Ar yr un adeg yr oedd Rob Samuel yn dal yn drydydd ond ar ei sodlau yr oedd Chris Holdsworth yn gwneud ei orau i ddal y tri o’i flaen a hynny a dim ond milltir a hanner ar ôl.

Daeth yn amlwg fod Alberto Vender yn ennill mwy o dir bob llam. Cyrhaeddodd y col tar caled – doedd fawr o le i neb ei basio, a gallai deimlo’n ei bod yn mynd yn haws arno. Ond colli tir wnaeth Chris Smith i Rob Samuel ac wedyn Chris Holdsworth.

Wrth gyrraedd y 400m diwethaf dechreuodd yr Eidalwr 22 oed Alberto Vender weld ei fod wedi gwireddu ei nod, a dod un un arall o redwyr mawr yr Eidal i adael ei ôl troed ar yr Wyddfa. Gyda’r gymeradwyaeth fyddarol yr oedd wedi ei lethu gan orfoledd wrtth groesi’r llinell derfyn.

Gwnaeth hynny mewn 1:06:41. Er nad oedd otj am hynny ar y pryd, mi oedd o fewn 2 eiliad i gyflymder ei gydwladwr a enillodd y llynedd. Roedd rhediad Chris Holdsworth i lawr yn un neilltuol o dda – yn well na 2017 – gan orffen yn ail mewn 1:07:30.

Lai na hanner munud ar ei ôl dyma Rob Samuel yn gorffen gyda bloedd o gymeradwyaeth gan y dorf. Mi oedd ei amser 1:07:53 y gorau yr oedd wedi ei redeg. Yn bedwerydd oedd Chris Smith o Loegr ac ar ei ôl yntau Simonetti o’r Eidal.

Yng nghystadleuaeth y timau, yr Eidal a orfu yn erbyn Lloegr wrth i’r wythfed safle gael ei ennill gan Manuel Solavaggione.

Yn ôl i ras y merched: Heb un cam o’i le yn y darnau dyrys anwastad hynny: Clogwyn  Allt Moses a Ty’n yr Ardd daeth Bronwen i lawr i ennil ei bri. Wrth gyrraedd y col tar i Lanberis, yr oedd yn amlwg nad oedd neb yn agos i’w herio. Yr oedd wedi gadael ei hôl ar Bencampwriaeth Ewrop yn 12fed safle fis Mehefin, a dyma garreg filltir arall yn ei thaith i lwyddiant.

Yn gorffen mewn 1:20:41, dyma’r amser cyflymaf i unrhyw Gymraeg ei gael erioed.

Nid fod hynny’n bychanu camp Miranda Grant o’r Alban yn ail teilwng (1:22:27), gyda Sophie Noon yn drydedd (1:23:00), Caitlin Rice yn bedwaredd a Scot Jill Stephen yn bumed.

Asgell gwybedyn oedd y gwahaniaeth rhwng Lloegr a’r Alban yn y gystadleuaeth tîm merched. Yr oedd gan y ddau dîm 16 pwynt. Ond gan fod yr Alban wedi cymryd yn llai o amser, dyna’r tîm ddaeth i’r brig: Miranda Grant, Steph Provan a Jill Stephen.

Meddai Bronwen Jenkinson:

“Gwireddu breuddwyn oedd hyn. Mae’n ras leol i mi, er ei bod yn ras o statws rhyngwladol. Mae’r ras hon yn un y gwn amdani o’m plentyndod. Dwi wedi gweld gymaint o redwyr da yn gadael ei hôl. A rŵan dwinna’n un o’r enillwyr!

“Mi oeddwn i’n obeithiol cyn y ras, er bod gen i ambell i wayw a phoenau mân yr wythnos yma. Does dim gwybod tan y diwrnod ei hun. Ond mi weithiodd pethau – anodd coelio!”

Yn ystod y diwrnod cafwyd dros 200 yn rhedeg yn y rasys ieuenctid o’r rhai dan 10 oed i rai dan 18 oed. Mae’n bosib bod rhai o enillwyr y dyfodol yn eu plith. Diolch yn arbennig i dîm Chwaraeon am Oes Cyngor Gwynedd am y trefnu.

Meddai Stephen Edwards trefnydd y ras:

Dyma ddiwrnod! Hefo’r ras yn cychwyn am hanner dydd, mae beth ydw i’n i gofio am y bora yn niwlog iawn, yn enwedig gan fod yna gymaint o waith hefo’r rasys ieuenctid hefyd. Doedd y tywydd ddim yn wych chwaith – fawr o ddim i weld yn y copa – dim ond cymylau. Ac mae’r ffaith bod yna gymaint o bobl hyd lle yn ei gwneud hi’n anodd bob amser. Ond fel arfer roedd y stiwardiaid a’r timau achub yn ymorol am y sefyllfa yn gwbl hyderus.

“Mi ydym yn cael cefnogaeth arbennig bob blwydd o’r Eidal. Mae’n cyswllt â Morbegno a ras Trofeo Vanoni yn parhau’n gadarn. Mae rhedwyr newydd medrus yn cyrraedd atom yn flynyddol, fel mae buddugoliaeth Alberto’n dangos eleni eto. Ond wrth gwrs allwn i ddim peidio â gwirioni o weld Bronwen yn ennill ras y merched a Rob yn drydydd yn ras y dynion !

“Mi ydan ni wedi magu traddodiad yma yng Nghymru o feithrin rhedwyr mynydd da, a gobeithio bod y ras heddiw wedi bod yn fodd i atgyfnerthu hynny.

“Mi hoffwn innau ddiolch yn arbennig i’r noddwyr, yn benodol Charlotte, Dylan, Jason a thîm Jewson am y gefnogaeth hael fel prif noddwyr. Hefyd Also inov-8, unwaith eto am eu nawdd a’r gwobrau i’r enillwyr. Diolch hefyd i’r Parc Cenedlaethol, Cyngor Gwynedd a thîm Chwaraeon am Oes (trefnwyr y rasys ieuenctid). A diolch unwaith eto am y gwirfoddolwyr a chefnogwyr a phobl Llanberis a’r ardal am wneud y diwrnod yn un i’w gofio.”

 Canlyniadau  Ras Ryngwladol yr Wyddfa 43ain Jewson

Dynio

  1. Alberto Vender (Yr Eidal) 1:06:41
  2. Chris Holdsworth (Lloegr) 1:07:30
  3. Rob Samuel (Cymru) 1:07:53

Tîm: Yr Eidal

 Merched

  1. Bronwen Jenkinson (Cymru) 1:20:41
  2. Miranda Grant (Yr Alban) 1:22:20
  3. Sophie Noon (Lloegr) 1:23:42

Tîm: Yr Alban

Y canlyniadau i gyd gan TDL Events Services yma/ here

Lluniau gan Sport Pictures Cymru yma/ here

Uchafbwyntiau  ar lein via S4C

DIWEDD

43ain JEWSON Ras Ryngwladol yr Wyddfa 2018 – Rhagolwg y Ras

by Stephen Edwards

Llanberis, Cymru – Gyda llai na wythnos cyn cychwyn Ras yr Wyddfa 43ain Jewson, Ras-yr-Wyddfa, mae disgwyl i’r ras fynydd eiconig hon fod yn safon uchel, gan fod dros 600 o rhedwyr yn barod i gwblhau un o’r rasus mynydd anodda’ yn y DU

Mae noddwyr Jewson, gyda chymorth cwmni sydd arwain ar redeg mynyddoedd; inov8 unwaith eto fel cefnogwyr mawr y digwyddiad yn 2018, sy’n dechrau hanner dydd o Gae’r Ddol yn Llanberis. Eleni, bydd y Cyng Ioan Thomas, Aelod Cabinet Datblygu Economi Cyngor Gwynedd yn cychwyn y ras.

Nodweddion eraill y dydd Sadwrn fydd Rasus Ieuenctid traddodiadol yn dechrau 12:10 (deg munud ar ôl y brif ras), Ras Teulu ‘Hwyl i Bawb’ yn cychwyn am 10.30am, a rasus iau lleol nos Iau, a rhagwelir bydd dros 200 o blant a phobl ifanc yn cymryd rhan. Mae’r Rasus Ieuenctid yn cael eu trefnu gan Tim Chwaraeon am Oes Cyngor Gwynedd ac wedi eu noddi gan Mantell Gwynedd a Cwmni lleol Am Dro.

Mae cofrestru ar gyfer y brif ras yn agor am 4yh ddydd Gwener Gorffennaf 20fed a bydd y cofrestru yn cau am 8.30yh gyda’r cofrestr diwrnod y ras yn cychwyn o 8.30yb hyd at 11.30yb ar 21 Gorffennaf.

Rydym yn rhagweld digwyddiad o safon uchel eto eleni gyda rhai o brif athletwyr y DU yn cymryd rhan. Bydd timau o Gymru, Lloegr, yr Alban, Gogledd Iwerddon, Gweriniaeth Iwerddon a’r Eidal unwaith eto yn mynd amdani i gwblhau y cwrs 10 milltir heriol o’r mynydd enwog hon yng nghanol Parc Cenedlaethol Eryri.

Ystyrir bod y ras yn un o’r rhai mwyaf ym myd rhedeg mynyddoedd ac yn denu rhai o redwyr gorau yn Ewrop. Fodd bynnag, mae’r digwyddiad wedi tyfu dros y pedair degawd ddiwethaf i fod yn un ar restr fwced sawl unigolyn ar draws y byd, gan ei fod yn rhywbeth mae miloedd yn anelu ato, ond dim ond cannoedd yn unig sy’n cwblhau’r ras o Lanberis i gopa’r Wyddfa.

Mae tystiolaeth o boblogrwydd cyffredinol y ras unwaith eto wedi bod yn amlwg gan fod y 650 o lefydd ar gael ar-lein ar y 1af o Fawrth wedi ei llenwi ymhen 2 ddiwrnod.

Rhagolwg Ras y Dynion

Yn gwisgo eu crysau rhyngwladol bydd balchder mwyaf fydd y rheini yng Nghymru. Mae golwg gryf iawn i dîm dynion Cymru A yn 2018 gan gynnwys aelod RAF Mike Kallenberg, Peter Ryder, Mark Hopkinson a’r rhedwr lleol Rob Samuel.  Bydd Samuel allan yn dyblygu ei ffurf o ychydig wythnosau’n ôl pan enillodd yn argyhoeddiadol y ras Twlight inov8 i gopa’r Wyddfa.

Mae Cymru hefyd yn ymgymryd â Thîm B yn ras y dynion, wedi ei ddosbarthu fel sgwad ddatblygol, sy’n cynnwys y bachgen o Dolgellau, Tom Roberts, Owen Roberts a rhedwr de Cymru, Dan Bodman.

Fel erioed, bydd tîm Lloegr yn gryf a byddant yn ceisio herio ar gyfer coroni unigolion a tim. 
Ar ôl ennill yn gadarn nol yn 2016 bydd Chris Smith yn dychwelyd i’r llinell gychwyn ac yn un i wylio allan amdano. Yn ymuno ag ef bydd Chris Holdsworth, pedwerydd yn 2017 yn ogystal a Tom Addison a Harry Holmes.

Ar bapur, un o’r timau mwyaf clasurol sy’n ymuno yn 2018 yw Tim yr Alban. Bydd enillydd 2012 Murray Strain yn ymuno gyda James Espie (5ed 2017), Robert Simpson ac Al Anthony. Mae pob un o’r pedwar wedi bod yn gryf iawn mewn rasus led led Prydain a Rhyngwladol ym 2018 a bydd yn frwydr wych ar gyfer teitl y tîm hwnnw yn erbyn pedwarawd Saesneg.

Mae gan yr Eidal hanes cryf yn y digwyddiad, gyda Davide Magnini yn ennillydd enwog yn 2017. Er bod y trio Giulio Simonetti, Alberto Vender a Manuel Solavaggione yn redwyr anhysbys, gallwn ni fod yn siŵr y bydd y ‘Azzurri’ yn heriol i anrhydeddau ddod diwrnod y rasio.

Mae gan Iwerddon hanes gyfoethog o lwyddiant yn y digwyddiad. Bydd James Kevan yn dychwelyd i arwain cwartet Gwyddelig cryf gan gynnwys Brian Furey, Seamus Lynch a Tom Lupton.

Ar ôl redeg gwych yn yr diweddar yn y bydd Mynydd Ewropeaidd, mae Zak Hanna yn arwain her Gogledd Iwerddon gyda rhedwr y dref yn 2017, Gavin Mulholland. Mae’r llinell gychwyn wedi gwblhau gyda William McKee a Tim Johnston.

Yn y ras agored, mae Tom Owens, rhedwr uwch-ryngwladol Salomon a Phrydain yn gwneud y daith i’r de a bydd yn ceisio herio mewn ras a redwyd yn ôl yn 2004!

Rhagolwg Ras y Merched

Mae tîm merched Cymru yn edrych yn gryf iawn gyda rhedwraig rhyngwladol y DU Bronwen Jenkinson yn ceisio gwella ar ei 4ydd safle yn 2017. Mae gorffeniad y 12fed safle yn ei hwb cyntaf yn y DU ym mhencampwriaethau Ewropeaidd diweddar yn tanlinellu ei ffurf. Bydd y rhedwyr mynydd Andrea Rowlands, a Katie Beecher yn ei ymuno, ynghyd a Elliw Haf (Eryri Harriers) fydd yn cystadlu i Gymru am y tro cyntaf eleni.

Nid oes unrhyw amheuaeth nad yw’r tîm merched yn Lloegr unwaith eto yn heriol ar gyfer lle gorau o’r podiwm. Mae Katie Walshaw, yn rhedeg eto ar ôl dangosiad cryf ym mhencampwriaeth mynydd Ewrop yn diweddar. Ymunodd Todmorden Harrier Annie Roberts â Walshaw, sydd wedi bod yn rhedeg yn dda ymhlith hyrwyddwyr Prydain yn 2018 gyda Sophie Noon a Louisa Powell-Smith.

Yn debyg i’r dynion mae Tim yr Alban yn addo llawer. Ar ôl ennill teitl ddiweddar ‘World Long Distance Mountain’, mae Charlotte Morgan mewn ffurf ysblennydd ac yn edrych i wella ar ei dangosiad diwethaf wrth orffen yn 5ed yn ras 2016. Bydd Stephanie Provan, Georgia Tindley a Jill Stephen yn ymuno sy’n addo i fod yn chwartet rhyfeddol o’r gogledd o’r ffin.

Bydd enillwyr Ras yr Wyddfa, Megan Wilson a Shileen O’Kane yn cynrychioli Gogledd Iwerddon ac yn cael eu hymuno â Sarah Graham ac Esther Dickson

Mae merched Gwyddelig wedi cipio’r ras yn y blynyddoedd diwethaf. Fodd bynnag, ar ôl Sarah Mulligan ennill yn 2013 a 2016, a buddugoliaethau olynol yn 2014 a 2015 ar gyfer Sarah McCormack, ni fydd merched Iwerddon yn teithio i’r ras yn 2018.

Mae trefnydd y ras, Stephen Edwards, yn awyddus i nodi bod y digwyddiad yn llawer mwy na dim ond hil, gyda noddwyr mawr, atyniadau ac ymdeimlad o ŵyl sydd bron yn dod â Llanberis i ddyddiad rasio traddodiadol trydydd penwythnos ym mis Gorffennaf

“Rydyn ni’n falch iawn o groesawu prif noddwr Jewson i’r ras eleni ac mae’r gefnogaeth oddi wrthynt wedi bod yn wych. Rydym hefyd yn falch o gael inov8 dan sylw ac fel bob amser yn ddiolchgar iawn i’n holl noddwyr.

 “Rydym hefyd yn ddiolchgar iawn i Gyngor Gwynedd, Tîm Digwyddiadau Gwynedd a Tîm Chwaraeon am Oes sy’n helpu gyda’r rasus ieuenctid unwaith eto yn 2018 ac rydym yn edrych ymlaen at groesawu’r Cynghorydd Ioan Thomas i gychwyn y ras am hanner dydd.


“Mae wedi bod yn haf gwych fel y gwyddom i gyd yn y DU pan ddaw’r tywydd a gyda’r gobaith o barhau gyda’r tywydd da rydym yn disgwyl un o’r torfeydd mwyaf erioed yn Llanberis eleni.

“Mae’r awyrgylch yn y pentref ar gyfer penwythnos Ras yr Wyddfa yn anhygoel, mae’n rhaid i chi fod yma er mwyn gallu deall hynny. Mae’r ras hon yn golygu gymaint i’r ardal a phobl Llanberis, maent yn falch o’r ras a’r hyn mae’n ei bortreadu i’r miloedd o ymwelwyr sy’n dod yma ar gyfer y ras a’r penwythnos. I feddwl beth sydd wedi dod yn yr holl flynyddoedd hynny ar ôl y ras gyntaf honno yn 1976 – mae’n anhygoel iawn.

“Dylai’r rasio fod yn wych unwaith eto, gyda maes cryf iawn o redwyr o’r cenhedloedd cartref, Iwerddon a’r Eidal. O safbwynt y cyfryngau, mae gennym becyn uchafbwyntiau teledu ar S4C y Sul ar ôl y ras am 9yh a byddwn yn defnyddio Facebook ‘Yn Fyw’ i ddarlledu gorffeniad y ras.

“Hwn fydd fy 10fed flwyddyn o drefnu’r digwyddiad eiconig hwn ac nid yw’n dweud na allwn roi’r ras heb y cannoedd o wirfoddolwyr sy’n cefnogi yn ystod y digwyddiad. Maent yn troi allan o flwyddyn i flwyddyn i help yn y ras a hoffwn ymestyn diolch anferth i bob un ohonyn nhw sy’n helpu i wneud Ras yr Wyddfa beth ydyw.”


Am ragor o wybodaeth hil, ewch i www.snowdonrace.co.uk

DIWEDD

2fed Ras Rynglwadol yr Wyddfa Jewson 2017 – Adroddiad yr Ras

by Stephen Edwards

Ras yr Wyddfa 2017 – Davide Magnini yn disgleirio i’r Eidal ac Annie Conway yn serennu yn ras y merched

Llanberis – Mynydd uchaf Cymru unwaith eto’n llwyfannu drama ar ddydd Sadwrn Gorffennaf 15, wrth i 600 o redwyr ar draws y byd gystadlu yn 42fed Ras yr Wyddfa dan nawdd Jewson.

Roedd yr awyr yn llwydaidd a doedd dim posib gweld ymhell iawn – hynny oedd yn wynebu rhedwyr eleni wrth ymlafnio i fyny ac i lawr am 10 milltir. Mae’n dipyn mwy o beth bellach nag oedd ar y dechrau yn 1976 pan gychwynnodd carfan llawer llai i’r copa 1085m o ganol y pentref.

Gyda nifer o dimau o wledydd eraill yn ymweld yr oedd teimlad rhyngwladol iddi, Daeth rhai o Loegr, Yr Alban, Gogledd Iwerddon, Gweriniaeth Iwerddon a mannau eraill o Ewrop. Ychydig funudau dros yr awr o’r cychwyn, dyma weld y dyn cyntaf yn cyrraedd Davide Magnini o’r Eidal ac yn ras y merched Annie Conway (rhedwraig i Salomon UK ac Ambleside) o Loegr .

Yn 20 oed mae Davide Magnini yn dilyn eraill o’i gydwladwyr Fausto Bonzi, Martin May a Marco DeGasperi, sydd wedi dod i’r brig yn y ras hon. Mae Annie Conway hithau yn enillydd Pencampwriaeth Rhedeg Mynydd 2016, yn dilyn merched enwog fel Carole Greenwood, Angela Mudge a Mary Wilkinson.

Roedd hi’n llawn iawn hefyd yn Llanberis gyda chymaint wedi dod i edrych ac i gefnogi’r rhedwyr yn gweld y 600 yn mynd ac yn eu hamser amrywiol yn dod yn ôl. Er nad oedd y tywydd yn wych gydag ysbeidiau o law mân arhosodd cannoedd tan y diwedd. Ac yn cychwyn y ras roedd un a enillodd y ras deirgwaith, Joan Glass efo Dennis ei gŵr

Wrth i’r ras fynd yn ei blaen a’r rhedwyr yn mynd i fyny’r lôn galed cyn cyrraedd y llwybr mynydd, roedd rhai grwpiau o redwyr yn dod yn amlwg. Mewn un grŵp Davide Magnini, Hannes Perkmann (o’r un tîm), a’r Saeson Chris Farrell a Chris Arthur. Ac wrth iddynt fynd heibio Hebron, Allt Moses, Clogwyn a Bwlch Glas roedd yn dod yn amlwg fod Davide Magnini yn geffyl blaen.

Roedd Annie Conway ar y dechrau yn ymryson â’r Gymraes ifanc Bronwen Jenkinson. Ac ar ôl methu â gorffen y llynedd roedd Bronwen yn benderfynol o wneud ei marc eleni. Dim ond Annie Conway o blith y merched blaen oedd heb fod yn cynrychioli ei gwlad. Wrth iddi gyrraedd llwybr y mynydd yr oedd yn amlwg ei bod o ddifrif, a phasiodd Bronwen Jenkinson a oedd ar y blaen ôl mynd tua milltir a hanner. Wedyn ar ei hôl aeth yn ymryson rhwng Bronwen Jenkinson Katie White o Loegr a Louise Mercer o’r Alban.

Wrth i’r cynion agosáu at y copa, daeth Davide o’r niwl glaw mân a’r cerddwyr niferus i gyrraedd yn gyntaf am 42:47. Hanner munud wedyn dyma Chris Farrell yn cyrraedd, ar ei ôl Hannes Perkmann. Yr oedd Tom Adams (a ddaeth yn drydydd) yn wythfed ar ran yma’r ras. Yn bedwerydd i’r copa oedd y Sais Chris Arthur, ond yn anffodus cafodd godwm hegar ar y llwybr ychydig cyn cyrraedd hanner ffordd.

Erbyn hyn roedd y rhedwyr blaen yn agosáu at y gwaelod. Roedd Davide Magnini i weld yn ysgafndroed wrth sboncio dros y cerrig a heibio’r cerddwyr. Dyma’r tro cyntaf iddo ymweld â Chymru – mae’n siŵr y bydd yn cofio’r ymweliad yn dda.

Yn ras y merched yr oedd Annie Conway yn y top am 50:53. O feddwl sut oedd hi roedd yn amser sydyn iawn. Yn ail i’r top roedd Katie White, wedyn Bronwen Jenkinson a heb fawr rhyngddynt wedyn *** Spencer – un arbennig o dda am redeg i lawr.

Yn ôl eto’n ras y dynion, roedd Davide Magnini y mynd fwyfwy ar y blaen wrth fynd i lawr. Mae’n siŵr iddo deimlo cledwch y tarmac serth i lawr tua’r diwedd, ond nid oedd hynny’n mennu dim arno wrth iddo orffen mewn amser gwych o 1:06:43, a’r tywydd a’r amgylchiadau nid o’r gorau.

Y tu ôl iddo o funud yn union Chris Farrell (1:07:43) yn ail am yr ail dro, gan iddo fod yn ail y llynedd hefyd. Ac yn drydedd wedi ennill nifer o safleoedd o’r copa roedd Tom Adams o dîm Lloegr yn gorffen mewn 1:09:15.

Yn syth ar ôl gorffen meddai Davide Magnini, “Dwi’n hapus iawn, mi oedd hi’n sicr yn ras anodd. Mi oeddwn i a’n meddwl am guro’r record i’r copa, ond unwaith yr es i dan y bont reilffordd (Clogwyn) mi oedd y gwynt yn chwythu’n groes ac yn gwneud hynny’n anoddach o dipyn!

“Mae Cymru’n wlad braf a gobeithio y caf gyfle i ddod yn ôl a gweld y wlad yn llawer gwell.”

Yng nghystadleuaeth y timau, gwnaeth Lloegr yn dda. Gyda Chris Farrell a Tom Adams a’r pedwerydd yn y ras Chris Holdsworth yn ennill i Loegr.

Yn y cyfamser yn ras y merched, daeth Annie Conway i gydag urddas i Lanberis. Cafodd un godwm fach tua’r gwaelodion ond ni wnaeth hynny fennu dim arni a gorffennodd yn daclus mewn amser o1:20:16.

Y tu ôl iddi roedd pethau’n poethi wrth i Louise Mercer basio Bronwen Jenkinson a Katie White a dod yn ail mewn 1:22:27. Wedyn Katie White (1:23:00) yn drydydd a Bronwen Jenkinson yn bedwaredd a’r cyflymaf o dîm merched Cymru.

Meddai Annie Conway “Roedd mynd i lawr yn medru bod yn ddigon anodd, ac mi ges godwm jest cyn cyrraedd y tarmac, mi oedd yn deimlad rhyfedd ond wnes i ddim oedi dim ond codi a dal i fynd. Mi ydw i’n falch iawn o ennill – mae ennill Ras yr Wyddfa yn golygu tipyn i mi”.

Yng nghystadleuaeth y tîm ar ôl Louise Mercer, Miranda Grant a Jill Spencer yn hawdd yn sicrhau buddugoliaeth i’r Alban.

Bu dros 200 o ieuenctid yn cymryd rhan ar y diwrnod mewn rasys rhai oedd o dan 10 i rai o dan 18. Efallai bydd rhai o enillwyr y dyfodol yn eu plith. Trefnwyd y digwyddiadau hyn gan Gyngor Gwynedd dan arweiniad Alun Jones fel rhan o raglen Chwaraeon am Oes.

Roedd y Trefnydd Stephen Edwards yn hapus iawn ar sut aeth pethau ac meddai:

“Mi oedd heddiw’n her, gan gychwyn y ras ddwyawr ynghynt ac wynebu tywydd nad oedd yn ddelfrydol yn enwedig tua’r copa lle na ellid gweld ymhell iawn. Ond fel arfer yr oedd y gwirfoddolwyr a’r stiwardiaid a’r timau achub yn gwybod beth i’w wneud.

“Braf ydy gweld rhedwyr o’r Eidal yn dal ati i ddod yma eto. Ac mae’n siŵr y bydd Davide yr enillydd ifanc yn siŵr o fod yn gwneud sioe ohoni yn y dyfodol. Am Annie Conway, dyma redwraig- pencampwr byd a bellach yn enillydd Ras yr Wyddfa hefyd.

“Mi leciwn i ddiolch i’r noddwyr i gyd, yn arbennig Charlotte, Dylan, Jason a thîm Jewson am eu cefnogaeth hael fel prif noddwr eleni. Hefyd inov-8, noddwr newydd am 2017 am eu cefnogaeth a’r gwobrwyon i’r enillwyr. Diolch hefyd i Barc cenedlaethol Eryri a Chyngor Gwynedd . Ac fel pob amser diolch o waelod calon i’r gwirfoddolwyr a chefnogwyr a phobl Llanberis am ei gwneud hi’n ddydd i’w gofio .”

42fed Ras Ryngwladol yr Wyddfa 2017 Jewson – Canlyniadau

Y Tri Dyn Cyntaf

1. Davide Magnini (Yr Eidal) 1:06:43
2. Chris Farrell (Lloegr) 1:07:47
3. Tom Adams (Lloegr) 1:09:15

Tîm: Lloegr

Y Tair Merch Gyntaf

1. Annie Conway (Salomon / Ambleside) 1:20:16
2. Louise Mercer (Yr Alban) 1:22:27
3. Katie White (Lloegr) 1:23:00

Tîm: Yr Alban

Y canlyniadau llawn ar lein yn TDL Events Services gwefan yma

Luniau gan Sport Pictures Cymru yma

Uchafbwyntiau’r ras ar Clic S4C am 30 diwrnod yma

GORFFEN

42fed Ras Ryngwladol yr Wyddfa Jewson 2017 – Rhagolwg

by Stephen Edwards

Yn Llanberis – a dim ond 10 diwrnod i fynd tan 42fed Ras Ryngwladol yr Wyddfa Jewson 2017 mae disgwyl garw am ddydd y ras. Dyma ras enwog a thros 600 o redwyr yn un o rasys mynydd anoddaf ym Mhrydain.

Eleni mae yna brif noddwr newydd: Jewson, a chefnogaeth hefyd gan wneuthurwyr esgidiau mynydd blaengar inov8.

Newid arall ydyw bod y ras yn cychwyn ynghynt. Yn lle am 2 pm mae bellach am hanner dydd. Ond mae’n dal i gychwyn o’r lle arferol, o Gae’r Ddol, Llanberis. Yn cychwyn y ras eleni bydd rhai o fawrion y ras yn y gorffennol Joan and Dennis Glass.

Bydd digwyddiadau eraill hefyd. Bydd ras yr ieuenctid yn cychwyn 5 munud ar ôl y brif ras am 12.05pm. Ond ar y nos Iau bydd rasys i ieuenctid yr ardal, lle disgwylir i tua 150 gymryd rhan. Diolch unwaith eto am gefnogaeth Dr.Zigs i’w cynnal.

Ar ddiwedd y diwrnod cynhelir sgwrs gan Kenny Stuart (deilydd record y ras), John Wild un o’i gyd-gystadleuwyr a rhedwr y ras sawl tro, a Steve Chilton yr awdur. Cynhelir y digwyddiad yn y Mynydd Gwefru a gobeithir y bydd yn hwyl ac ysbrydoliaeth. Bydd yn cychwyn am 3:30pm (am ddim, rhoddion i Rhodd Eryri).

Gellir cofrestru am y brif ras rhwng 4pm ac 8.30pm ddydd Gwener 14eg o Orffennaf ac ar y Sadwrn y ras rhwng 8.30am a 11.30am.

Mae disgwylgarwch mawr am ras 2017, gyda rhai o athletwyr gorau Prydain yn cymryd rhan. Unwaith eto bydd timau rhyngwladol yn herio ei gilydd am 10 milltir galed i fyny ac i lawr yr hen fynydd: Cymru, Lloegr, Yr Alban, De a Gogledd Iwerddon a’r Eidal.

Ystyrir y ras hon yn un o’r rhai mwyaf ym myd rhedeg mynydd, ac mae’n denu rhai o oreuon Ewrop. Mae wedi tyfu yn dros y pedwar degawd a aeth heibio, i fod yn rhywbeth i’w gyflawni unwaith mewn oes i sawl un – yn breuddwydio jest gwneud y ras. Mae sawl un yn meddwl am y peth ond ychydig sy’n cyrraedd y nod.

Yn dangos pa mor boblogaidd ydyw’r ras, mae cyflymder y modd y llanwodd y rhestr rhedwyr. Agorwyd y drws cystadlu ar y cyntaf o Fawrth ac ymhen tridiau roedd 650 o’r rhedwyr wedi talu am gystadlu a dim mwy o le i neb arall.

Bydd rhai o redwyr Cymru gyda’r balchaf o’u crysau rhyngwladol. Yn nawfed y llynedd, bydd Russell Bentley yn gwisgo crys coch. Ac ar ei orau eleni mae Gareth Hughes – yn hanu o ardal y ras. Bu ef a Mathew Roberts ( un arall o dîm Cymru) yn cynrychioli Prydain yn ddiweddar . Gobeithir y bydd y ddau yn gwneud eu hôl ar y ras y tro yma. A’r rhedwr rhyngwladol Richard Roberts ydyw pedwerydd aelod y tîm a’r capten.

Ond eto fyth yn 2017 hefyd y tîm i’w guro fydd tîm Lloegr. Ni fydd Chris Smith enillydd 2016 yn cystadlu, ond gallai unrhyw un o dîm Lloegr fod yn enillwyr y ras : Chris Farrell, Chris Arthur, Tom Adams a Chris Holdsworth. Mae bob un yn goblyn o redwr. Ar ôl bod yn ail llynedd tybed mai Chris Farrell fydd yn mynd a hi eleni.

Yn y gorffennol disgleiriodd yr Eidal sawl gwaith. Ac y mae gefeillio hefo ras Trofeo Vanoni fis Hydref wedi cadarnhau perthynas gref rhwng yr Eidal a Chymru. Yn 2017 bydd Nadir Cavagna, Davide Magnini a Hannes Perkmann yn cynrychioli’r dynion tra bydd Arianna Oregon yr unig ferch o’r Eidal.

Mae De Iwerddon wedi cael cryn lwyddiant yn y ras dros y blynyddoedd. Ac eleni bydd James Kavan (8fed 2016) yn arwain y tîm. Y tri arall fydd Brian Furey, Greg Byrne a Killian Mooney. Yn cynrychioli’r Gogledd bydd David Hicks (yn yr 20 cyntaf yn 2016) William McKee, Gavin Mulholland a Timothy Johnston.

Bydd rhai o safon hefyd yn rhedeg ar ran Yr Alban. Cafodd sawl un, dynion a merched eu gwobreuo yn y rasys diweddar. Yn arwain tîm y dynion bydd James Espie (9fed yn 2016) gyda James Waldie, Robert Simpson a Douglas Tullie. 

Mae merched Iwerddon wedi bod yn amlwg yn y ras yn ddiweddar. Ar ôl i Sarah Mulligan ennill yn 2013, a Sarah McCormack yn 2014 a 2015, ac wedyn Sarah Mulligan eto yn 2016 mae’r crys gwyrdd wedi ennill bedair blynedd yn olynol. Fodd bynnag, yn rhyfeddol, does yna ddim merch o Iwerddon yn cystadlu eleni. Mae hyn yn agor y drws i ferch o wlad arall. Efallai mai’r ffefryn ydyw Heidi Dent o Loegr. Hi oedd yr ail yn 2016. Tybed mai hi felly fydd yn dilyn rhai fel Mary Wilkinson a Pippa Maddams. Gyda hi yn nhîm merched Lloegr fydd Helen Glover, Sharon Taylor a Caitlin Rice

Diane Wilson, Megan Wilson, Ciara Largy a Shileen O’Kane fydd yn cynrychioli Gogledd Iwerddon a bydd Miranda Grant, Louise Mercer a Jill Stephen yn rhedeg dros yr Alban. Bydd Miranda Grant sy’n byw’n lleol ac wedi gwneud yn dda eleni yn Eryri, hefyd yn gobeithio gwneud ei marc ar Ras yr Wyddfa.

Mae tîm merched Cymru i gyd yn byw yng Ngogledd Cymru. Yr ieuengaf yw Bronwen Jenkinson a fu’n rhedeg i ieuenctid Prydain. Hefo hi bydd Andrea Rowlands and Sarah Ridgway, sydd â thipyn o brofiad ar y mynyddoedd bellach. Sarah newydd redeg yn dda yn ddiweddar yn V3K. A’r bedwaredd yn y tîm fydd Sian Lloyd Williams o Borthmadog.

Yn y ras agored bydd rhai o’r hen lawiau Ian Holmes a Rob Hope yn bwrw iddi ymhlith y rhedwyr rhyngwladol gyda Gary Priestley a fu ar yn aml yn rhedeg i Loegr ond bellach eleni yn cynrychioli ei glwb Horwich.

Mae trefnydd y ras, Stephen Edwards, yn awyddus iawn i bwysleisio bod y ras yn fwy na jest ras. Hefo noddwyr blaenllaw, atyniadau niferus a gŵyl o ddigwyddiad, sydd i’w gael yn Llanbêr ganol Gorffennaf:

“Mi ydan ni’n falch o groesawu Jewson fel prif noddwr eleni ac mi ydan ni wedi cael cefnogaeth wych gan y cwmni. Mi ydan ni hefyd wrth ein boddau bod inov8 yn rhan o’r gefnogaeth. Mi ydan ni hefyd yn ddiolchgar iawn i’n holl noddwyr. Afraid dweud hefyd na fysan ni ddim yn medru cynnal y ras heb gannoedd o wirfoddolwyr helpu a stiwardio,gan ddod flwyddyn ar ôl blwyddyn i helpu’r achos. Mi ydw i hefyd yn edrych ymlaen at weld Joan a Dennis Glass yn cychwyn y ras am hanner dydd. Maen nhw wedi gwneud cymaint dros y ras a thros redeg.

“Bydd y bwrlwm yn Llanberis yn arbennig iawn. Rhaid bod yno i’w deimlo. Mae’r ras yn golygu cymaint i’r ardal. Mae yna falchder mawr o’r ras a’r darlun mae’n ei roi o’r pentref i filoedd o ymwelwyr sydd yma dros y cyfnod. I feddwl faint mae hi wedi tyfu o’r dechrau digon tila yn 1976 – mae’n anodd coelio.

“Mi ddylai’r rasio fod yn wych eto eleni hefo cymaint o rai da’n rhedeg. O ran y cyfryngau bydd rhaglen o’r uchafbwyntiau ar y dydd Sul canlynol ar S4C a bydd diwedd y ras yn cael ei ddangos ar Facebook Live.”

Am wybodaeth bellach ewch i www.snowdonrace.co.uk

ENDS

2016 runner-up Chris Farrell from England on the early slopes of Snowdon © Sport Pictures Cymru

Press and media enquiries (including hi res image requests) should directed to Matt Ward on 07515 558670 or by emailing matt@runcomm.co.uk

KENNY & JOHN: What do they have to say?

by Stephen Edwards
For one brilliant season in 1983 the sport of fell running was dominated by the two huge talents of John Wild and Kenny Stuart. Wild was an incomer to the sport from cross country and track. Stuart was born to the fells, but something of an outcast because of his move from professional to amateur. Together they destroyed the race records, and both won Snowdon at their peak. Kenny still hold sthe course record, and me personally NO ONE will break that record!!

Come and hear about their exploits, and meet two legends at this illustrated talk and Q&A session. Also a chance to get signed copies of Steve Chilton’s Fell Running Trilogy.

As the JEWSON International Snowdon Race has a early start time of 12noon, we as a committee needed to fill the time between the presentatioon and the post race meal. So we came up with the idea of have the Q&A with Kenny & John with Steve keeping control of everything
This is a FREE Q&A session, the venue will seat 150 and appreciate of any donations towards the Snowdonia giving Charity.
KENNY & JOHN
Venue – Electric Mountain, Llanberis (same building as the registration)
Time – 3.30pm – 5pm
Cost – FREE
Seat – 150
Looking forward to ses you in Llanberis 15th July either in th erace or in the talk
Regards
Stephen Edwards
Race Organiser

Cyflwyniad 42ain Ras Ryngwladol yr Wyddfa Jewson 2017

by Stephen Edwards

Yn sicr gyda noddwr newydd a thros 650 yn rhedeg bydd 42ain Jewson Ras Ryngwladol yr Wyddfa Jewson, Llanberis  yn un o uchafbwyntiau chwaraeon Cymru eleni.

Mae cryn ddisgwylgarwch am ras eleni. Eto fyth bydd rhai o redwyr gorau Prydain yn cymryd rhan. Bydd y 10 milltir arw i fyny ac i lawr yr hen fynydd yn gweld cystadleuaeth frwd rhwng timau o Gymru, Lloegr, Yr Alban, De a Gogledd Iwerddon a’r Eidal. 

Ystyrir hon gyda’r fwyaf o rasys rhedeg mynydd, gan dynnu rhedwyr o wledydd ar draws Ewrop. Ond dros y blynyddoedd daeth fwyfwy yn ras mae sawl rhedwr cyffredin wedi ei gosod ar ei restr i’w gwneud unwaith mewn oes. Ond mae sawl un wedi meddwl am y peth, ond ychydig iawn sydd wedi cyrraedd y nod.

Eto’n dangos poblogrwydd y ras yn 2017, oedd gweld pa mor sydyn y llanwyd y 650 o lefydd rhedeg. Unwaith y daeth y cyfle i gystadlu ar lein ar Fawrth y cyntaf, chymerodd hi fawr mwy na diwrnod nad oedd bob lle wedi ei gymryd. O fewn dim yr oedd y trefnydd Stephen Edwards yn medru anghofio am y rhan yna o’i orchwyl a mynd ati i ymorol am y trefniadau eraill.

Mae Stephen bob amser yn awyddus i bawb sylweddoli bod mwy na jest ras yma. Gyda noddwyr hael ac atyniadau amrywiol mae yma hefyd ysbryd gŵyl sy’n llenwi Llanberis pob trydydd penwythnos ym mis Gorffennaf:

“Bydd ras 2017 gyda’r gorau erioed! Mae gynnon ni brif noddwr newydd eleni – Jewson. Gwelodd y cwmni fod yma gyfle da i noddi ras o bwys lleol a rhyngwladol a chael ar yr un pryd gyfle arbennig i gysylltu â’r gymuned leol. 

“Mae yna ffasiwn gyffro yn Llanbêr pan mae dydd y ras yn agosau. Rhaid bod no i’w synhwyro. Mae’r ras yn golygu cymaint i bobl y pentref a’r ardal. Mae nhw’n falch iawn o’r digwyddiad a’r modd y mae’r digwyddiad yn dod â’r ardal i olwg cymaint o ymwelwyr o bob than o’r byd. Mae’n anhygoel meddwl faint mae’r ras wedi tyfu a ffynnu o’i chychwyn digon syml bell bell yn ôl yn 1976.”

Meddai Charlotte Bird ar ran Jewson: 

“Mi ydym bob amser yn meddwl am ffyrdd i helpu’r gymuned yr ydan ni ynddi hi. Yma yn y Gogledd mae gynnon ni’r Wyddfa – mynydd arbennig iawn ar ein stepan drws. Mae’n rhan o’r cefndir bob amser i’n safleoedd ac i’n cerbydau nwyddau wrth iddyn nhw fynd ati i wneud eu gwaith. A hithau’n tynnu rhedwyr o bedwar ban byd, dyma gyfle neilltuol i ni gael estyn help i’r ras arbennig hon a dymuno pob llwyddiant a llewyrch iddi hi.

Meddai Stephen Edwards hefyd:

“Noddwr arall yn 2017 ydyw inov-8. Dyma’r cwmni esgidiau rhedeg mynydd gyda’r blaenaf yn y byd. Felly dyma dewis cwbl briodol i Ras yr Wyddfa. Bydd inov-8 yn bresennol ar ddiwrnod y ras ac fel noddwyr y crysau t yn ogystal ag yn rhoi gwobreuon i’r enillwyr. Un o’r rhai sydd wedi hwyluso’r cyswllt hwn yw Pete Bland Sports, un arall o’n noddwyr tymor hir. Bydd y cwmni hwn hefyd yn amlwg ar ddiwrnod y ras.

“Newid arall eleni ydyw y bydd y brif ras yn cychwyn ddwyawr ynghynt am hanner dydd. Mae’r newid wedi cael croeso gan redwyr a mudiadau lleol. Bydd ras yr ieuenctid yn cychwyn yn fuan wedyn am 12.05pm. Bydd yn cael ei noddi gan yr arbennigwr swigod Dr. Zigs, ac mewn partneriaeth â “Chwaraeon am Oes” Cyngor Gwynedd Council. Bydd rasys plant “Hwyl i Bawb” yn y bore am 10.30am.

“Dylai’r rhedeg fod yn arbennig, gyda chymaint o rai da yn cymryd rhan. Bydd uchafbwyntiau’r ras ar y teledu, ar S4C ar y Sul canlynol am 6pm, a bydd diwedd y ras yn cael ei ddangos ar Facebook Live. 
Fel mudiad gwirfoddol, mi ydym wrthi am oriau lawer yn trefnu y cwbl. Mae cymaint o fusnesion lleol yn cyfrannu at yr achlysur a miloedd yn dod i gefnogi. Mae pawb sy’n cyfranogi’n elwa’n fawr o’r digwyddiad.

“Ond heb nawdd o sawl cyfeiriad, fyddai’r ras ddim yn cael ei chynnal. Diolch felly i Clif Bar, Rheilffordd yr Wyddfa, First Hydro, Gwesty’r Victoria , S4C,, Parc Cenedlaethol Eryri, Athletau Cymru, Ffrwythau DJ, Sports Pictures Cymru a phawb sydd ar y pwyllgor a chymuned Llanberis. A dyna sy’n gwneud yr holl beth mor hynod – digwyddiad rhyngwladol ond un sydd â’i wreiddiau’n ddwfn yn gymdeithas leol. Hir y parhao!”
Hefyd yr haf yma bydd Ras Gwylnos yr Wyddfa inov-8, sydd eto’n cael ei threfnu gan yr un tîm â Ras yr Wyddfa. Cynhelir y ras hon, i fyny’n unig, ar ddydd Gwener Mehefin 9. Bydd disgwyl tua 150 rhedwr. Bydd yn cychwyn am 7pm. Gellir cofrestru i gystadlu ar wefan Ras yr Wyddfa.

DIWEDD

Ymholiadau y wasg a’r cyfryngau (gan gynnwys lluniau manylder uwch) at Matt Ward ar 07515 558670 neu ebost matt@runcomm.co.uk

Matt Ward
PR, Ras Ryngwladol yr Wyddfa / International Snowdon Race
+44(0)7515 558670

Cefndir i Ras Wyddfa (41) Elim Peugeot 2016

by Stephen Edwards

Llanberis, – Eleni mae noddwr newydd i’ Ras Ryngwladol yr Wyddfa 41 Elim Peugeot a chyda 650 o redwyr mae’r digwyddiad yn siŵr o fod yn un o uchafbwyntiau byd chwaraeon Cymru.. Y llynedd mi oedd yna sbloet o ddathlu’r deugeinfed ras gyda chyn-enillwyr ac yn cychwyn o’r Stryd Fawr. Eleni bydd y ras yn cychwyn yn y lle arferol ym Mharc Padarn ar ddydd Sadwrn Gorffennaf 16.

Mae edrych ymlaen mawr am y ras eleni. Mae rhai o redwyr gorau Prydain yn cystadlu.. Mae timau o Gymru, Lloegr, Yr Alban, Iwerddon, Gogledd Iwerddon a’r Eidal. Unwaith eto bydd y rhain yn gwthio i’r eithaf am y 10 milltir i fyny ac i lawr yr hen fynydd.

Mae’r ras yn cael ei hystyried yn un o’r rhai mwyaf o ran rhedeg mynydd ac yn denu cystadleuwyr o bob rhan o Ewrop. Ond dros amser tyfodd y digwyddiad. Daeth yn ddigwyddiad y mae sawl un wedi ei osod fel rhywbeth y byddent yn rhoi ar restr o bethau i’w cyflawni unwaith yn eu hoes.

Cyn y ras eleni hefyd bydd Cwpan yr Wyddfa – ras i fyny’n unig (drwy wahoddiad yn unig). Bydd yn dechrau am 10.30am ar ddiwrnod y ras, gyda rhedwyr arbennig iawn yn cystadlu..

Mae’n amlwg bod hon yn ras fawr yn boblogaidd iawn. Dridiau yn unig ar ôl Mawrth 1, pan oedd cyfle i wneud cais am redeg, mi oedd y 650 lle wedi eu cymryd. Wedyn gallai’r trefnydd Stephen Edwards fwrw iddi gyda’r paratoadau. Meddai:

“Fel bob tro mi oedd digonedd eisio cystadlu. A byth ers yr amser cau mi ydw i wedi cael sawl un yn gofyn am le i redeg er bod y ras yn llawn. Ychydig feddyliwyd yn 1976 pan gynhaliwyd y ras gynta’, faint o ddigwyddiad fyddai erbyn heddiw. Mae’r Wyddfa bellach yn un o’r mynyddoedd mwya’ poblogaidd ym Mhrydain a dyna ydy peth o’r atyniad i rai rhedwyr – cael y teimlad fod yna wylwyr a chefnogwyr ar hyd y llwybr i’r top ac i lawr wedyn..

“Dylai fod yn ras wych eto gyda chystadleuwyr brwd iawn. Bydd y ras ar S4C ar y Sul ac ar ddiwrnod y ras ar ôl 6 y noson honno bydd diwedd y ras ar Facebook Live.”

Mae cystadleuaeth y dynion yn gwbl agored eto eleni.

Ar ôl ennill dair gwaith yn 2002, 2003 a 2005 bydd Tim Davies yn cystadlu eleni, ar flaen tîm Cymru cryf. Hefo fo bydd Matthew Roberts, Russell Bentley a’r rhedwr lleol Gareth Hughes.

Ar ôl brwydr neilltuol y llynedd bydd y trydydd y pryd hwnnw, Ben Mounsey o Loegr yn ôl i weld all o ennill yn 2016. Mae gan Loegr dîm da iawn gyda Ben Mounsey bydd Chris Smith, Rob Hope a Chris Farrell.

Yn dilyn buddugoliaeth Emanuele Manzi llynedd bydd gan yr Eidal dri rhedwr newydd Marco Leoni, Luca Cognate a Gianpietro Bottà. Bydd Nicola Pedergnana yn cystadlu yn ras y merched.

Mae Iwerddon wedi gadael ei hôl sawl gwaith ar y ras. Eleni bydd Brian MacMahon hen law ar y ras, yn arwain gyda James Kevan, Brian Furey, Andrew Annett yn gwneud y tîm o bedwar, Tîm Gogledd Iwerddon ydyw William McKee, Shane Donnelly, David Hicks a Zak Hanna.

Merched Iwerddon sydd wedi bod yn flaenaf yn y ras y tair blynedd ddiwethaf. Ar ôl buddugoliaeth hanesyddol Sarah Mulligan yn 2013, wedyn Sarah Mc Cormack yn ennill yn 2014 a 2015. Ac mae Sarah sy’n 29 oed, yn ei hôl eto eleni i geisio cael tair buddugoliaeth yn olynol. Hefyd yn nhîm Iwerddon bydd Bethany Murray.

Bydd tîm Iwerddon yn cael eu herio gan Loegr, gyda Lindsey Brindle yr ail llynedd yn eu plith. Bydd Lou Roberts yn y tîm. Hi oedd enillydd Ras y Gwyll eleni. Y drydedd yn y tîm ydyw Heidi Dent.

Mae tîm merched Cymru yn un go newydd gyda Bronwen Jenkinson a Sian Williams yn ymuno â Katie Beecher, y bumed yn ras y llynedd. Tîm Gogledd Iwerddon ydyw Shileen O’Kane, Hazel McLaughlin a Paulette Thompson..

Ar hyn o bryd nid oes sicrwydd pwy fydd yn cynrychioli’r Alban.

Fel y soniwyd bydd rhai rhedwyr neilltuol iawn yn cystadlu am Gwpan yr Wyddfa yn y bore. Bydd enillydd y llynedd Max Nicholls yn dychwelyd a bydd eraill yno yn defnyddio’r ras fel hyfforddiant ar gyfer Treialon Rasys Mynydd Prydain cyn Pencampwriaeth Rasio Mynydd y Byd yn yr Eidal fis Awst. Bydd trydydd yn ras y llynedd yno Martin Cox a hefyd rhedwyr rhyngwladol Prydain Tom Adams a Jacob Adkin.

Mae pencampwraig Rhedeg Pellter ar Fynydd y Byd Annie Conway yn debygol o fod yn cystadlu yng Nghwpan yr Wyddfa. Bydd y ordyrrog hon o’r Hen Ogledd yn defnyddio’r ras fel modd i baratoi ar gyfer Treialon y Byd ddiwedd mis Gorffennaf..

Mae Stephen Edwards yn awyddus iawn i atgoffa pawb fod y ras yn fwy na jest ras, byd yr achlysur yn ddigwyddiad o bwys, gyda noddwyr atyniadau ac awyrgylch gŵyl pob mis Gorffennaf yn Llanberis.:

“Corff gwirfoddol sy’n trefnu pob dim, ac mae oriau ac oriau o waith paratoi i’r digwyddiad. Mae sawl busnes lleol yn ymwneud â’r achlysur a bydd miloedd yn dod draw i weld y ras. Eleni bydd rasys ‘Hwyl i Bawb’ i’r plant bach am 11 o’r gloch fore’r ras a bydd y rasys plant yn cychwyn ar ôl y ras fawr am 2 o’r gloch y pnawn.

“Mae cyffro yn Llanbêr wrth i ddydd y ras agosáu. Mae’r ras yn golygu cymaint i’r pentref a’r ardal. Mae pawb mor falch o’r ras a’r awyrgylch y bydd yr ymwelwyr yn siŵr o fod yn ei deimlo. Mae’n anhygoel fel mae’r holl beth wedi tyfu dros y deugain mynydd er 1976.”

Mae Stephen hefyd yn falch iawn o groesawu’r noddwyr newydd Elim Peugeot. Cyn hynny cefnogwyd y ras am 3 blynedd gan Tyn Lon Volvo.

Meddai Colin Smart o Elim Peugeot Llangefni:

” Mae Elim Peugeot yn werthwyr ceir lleol adnabyddus. Mi ydym yn falch o noddi digwyddiadau yn yr ardal. Yr ydym wedi bod wrthi bellach ers 50 mlynedd ac wedi cychwyn yn wreiddiol yn Llanrug prin dair milltir i ffwrdd. Braf ydyw cael gweld ein henw fel prif noddwr yn un o gystadlaethau rhedeg mynydd mawr y byd – un o rasys anoddaf Ewrop gyda rhedwr o safon ryngwladol.

“Bu Elim Peugeot yn gweithio’n glos gyda’r pwyllgor i wneud yr hyn oedd eisio i noddwr ei wneud. Mi ydym yn noddi sawl digwyddiad arall elusennol ar draws Cymru drwy’r flwyddyn.

“Mi ydym yn dra diolchgar i bawb sydd wedi ymwneud a chodi arian i’r fath achlysuron dros y flwyddyn ac yn edrych ymlaen i helpu’r digwyddiad gryfhau o nerth i nerth. Dewch draw atom ar y diwrnod i gael golwg ar yr hyn sydd gennym i’w gynnig. A phob lwc i bawb sy’n rhedeg..”